БҚО-да «Нұрлы жол» аясында 2,5 млрд. теңгеге тоғыз жоба қолға алынды

ОРАЛ. ҚазАқпарат - Батыс Қазақстан облысында биыл «Нұрлы жол» бағдарламасына сәйкес 2,5 млрд. теңгеге тоғыз жоба жүзеге асырылуда, деп хабарлайды «ҚазАқпарат» тілшісі.

Облыс әкімінің орынбасары Бағдат Азбаевтың сөзіне қарағанда, өңірдің Ақжайық, Бөрлі, Зеленов және Сырым аудандарында 28,8 км жылу және 185,7 км сумен қамту желілері қайта құрылмақ. Осы жобалар мәреге жеткен кезде 12 мыңнан астам адам тұратын 8 елді мекен сапалы ауыз сумен және Бөрлі ауданы орталығы Ақсай қаласында 15 мыңнан астам тұрғын жылумен қамтамасыз етілмек.

«Күні бүгін барлық нысандар бойынша конкурстық рәсімдер аяқталды. Енді мердігер компаниялар іске кірісетін болады», деді Б.Азбаев.

Айта кетейік, Елбасы бастамасымен қолға алынған «Нұрлы жол» мемлекеттік бағдарламасы 2015 жылдан бері жүзеге асырылып келеді.