ОРАЛ. ҚазАқпарат – Батыс Қазақстан облысында биылғы он айда тұрғын үй секторында 310-нан астам өрт болды, деп хабарлайды ҚазАқпарат тілшісі.
БҚО ТЖ департаментінің баспасөз қызметінен түскен мәліметке қарағанда, соның салдарынан алты адам қаза тапты.
Тұрғындар арасында сақтандыру шаралары жүргізіліп жатқанымен, өрт тыйылар емес.
31 қазан күні сағат 13.56-да Ақжайық ауданы Мерген ауылдық округінде Кіші кардон қыстағында тұрғын үйдің өртенгені жөнінде хабар түскен.
Аумағы 80 шаршы метрді қамтыған өрт 15.45-те оқшауланып, 17.41-де ауыздықталды. Оған 4 адам, 1 техника жұмылдырылды.
Бұл жолы зардап шеккендер болған жоқ.
Сол секілді тұрғындардың қысқа жинаған мал азығы да қас-қағымда күлге айналуда. Мысалы, 30 қазан күні Сырым ауданы орталығы Жымпиты ауылында 11,5 тонна пішен жанып кетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).