ОРАЛ. ҚазАқпарат - Кеше Қазталов ауданы Талдыапан ауылынан 17 шақырымдай қашықтықта болған дала өртінен 100 ешкі, 90-нан астам қой тірідей жанып кетті, деп хабарлайды «ҚазАқпарат» тілшісі.
БҚО ТЖ департаментінің баспасөз хатшысы Нұргүл Мұқанованың айтуынша, сағат 21.00-де сөндірілген өртті ауыздықтауға 38 адам, 8 техника жұмылдырылған.
Талдыапан ауылдық округінің әкімі Асқар Есқалиевтің сөзіне қарағанда, қой бағып жүрген 1990 жылғы азаматтың денесін 70 пайыз күйік шалған. Қазір ол Жалпақтал ауруханасында жатыр.
Еске сала кетейік, кеше сондай-ақ Ақжайық ауданы Базаршолан және Базартөбе ауылдық округтерінде өрт тіркеліп, шабындық және жайылымдық жерлер отқа оранған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).