ОРАЛ. ҚазАқпарат – Батыс Қазақстан облысында емделуші ауруханаға от қойып, өзі екінші қабаттан секіріп кеткен, деп хабарлайды ҚазАқпарат тілшісі.
БҚО ТЖ департаментінің баспасөз қызметінен түскен мәліметке қарағанда, оқиға 17 ақпан күні таңертең Тасқала ауданы орталығы Тасқала ауылында болған.
Сағат 05.41-де аудандық орталық аурухана терапия бөлімшесінің №8 палатасы жанып жатқаны жөнінде хабар түскен.
Өрт аумағы 15 шаршы метрді қамтыды. Оқиға орнынан 20 науқас (оның төртеуі – бала) пен 8 жұмысшы-қызметкер эвакуацияланды. 2 адам құтқарылса, оның біреуі – бала. Олардың барлығы бірінші қабатқа орналастырылды.
Тілсіз жау өрт сөндірушілердің күшімен (11 адам, 3 техника) 06.05-те оқшауланып, 06.16-да ауыздықталды.
Өрттің шығу себебі анықталды. Емделуші матрасқа от қойып, өзі екінші қабаттың терезесінен секіріп, бой тасалаған.
Полиция қызметкерлері күдіктіні ұстап, қазіргі кезде тергеу амалдары жүргізілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).