Осы заңбұзушылықтарды жою мақсатында 1 мыңнан астам қадағалау актілері енгізіліп, 469 заңсыз акті, соның ішінде 11 нормативтік-құқықтық акті бұзылды. Бір жыл ішінде 28 мыңнан астам азаматтың конституциялық құқығы қорғалып, 2,5 мың адам түрлі жауапкершілікке тартылды. 38 қылмыстық құқықбұзушылық бойынша сотқа дейінгі тергеп-тексеру басталды. Бюджетке 4,2 млрд. теңгенің толтырылуы қамтамасыз етіліп, 243 млн. теңгенің мүлкі мемлекетке қайтарылды.
Прокуратура қызметкерлерінің мәлім еткеніндей, кез келген құқықбұзушылықтың алдын алуға арналған жобалық тәсіл белсенді түрде енгізілуде. Айталық, 2016 жылдың тамызынан облыс прокуратурасы мен өңір әкімдігінің бірлескен бес жеке жобасы және бас прокуратураның тағы бес жобасы жүзеге асырылуда. Әлеуметтік шиеліністің ықтимал ошақтарының картасы облыстағы қоғамдық-саяси жағдайдың қалыпты болуына өз ықпал-әсерін тигізуде. Соның нәтижесінде сегіз келелі мәселе өз шешімін тапты. Сол секілді жыныстық қол сұғылмаушылық саласындағы қылмыстарға қарсы іс-қимыл туралы жоба азаматтардың құқықтық мәдениеті мен ата-ананың жауапкершілігін арттыруға бағытталып отыр. Қазірдің өзінде кәмелетке толмағандарға қарсы күш көрсету қылмыстарын азайтуға қол жеткізіліп, ол 29,4 пайызға төмендеді. Екі жылға есептелген «Құмар ойынсыз қала» жобасы облыс орталығында жүзеге асырылуда. Кәсіпкерлер палатасымен бірлесе жүргізілген құқықтық-түсіндіру жұмыстары нәтижесінде өз еріктерімен айналымнан 40 ойын автоматы алынды. Мәжбүрлі түрде 38 автомат алынып, 18 онлайн-казиноның қызметі тоқтатылды. Мұндағы мақсат - қала аумағындағы заңсыз ойын бизнесін толықтай жою. Сондай-ақ мал ұрлығына қарсы бірлескен іс-қимыл нәтижесінде бұл қылмыс 18 пайызға азайса, «Табиғатты бірге қорғайық» жобасы тұрмыстық қалдықтарды 101 мың тоннадан 87 мың тоннаға дейін қысқартуға мүмкіндік берді. Өнеркәсіп қалдықтарын кәдеге жарату көлемін арттыру арқылы қоршаған ортаға келтірілетін залал 72 пайызға төмендеді. Өкілетті органдардың қызметін тиімді үйлестіру арқылы еңбек қатынастары саласында тұрақтылық сақталды. Соның нәтижесінде 2,5 мың жұмысшыға 283 млн. теңге жалақы берешегі уақтылы өтелді. Оған қоса мемлекеттік кәсіпорындардың жұмыспен қамту орталықтарына бос жұмыс орындары туралы хабарламауының 1,8 мыңнан астам дерегі белгілі болып, қабылданған шаралар бойынша 437 адам еңбек орнын тапты. Облыс прокуратурасының бастамасымен қараусыз қалған 28 ауланың спорт алаңы қайта жабдықталып, 5 мыңнан астам жеткіншек спортпен айналысуға мүмкіндік алды.
Сыбайлас жемқорлықпен күрес пәрменді жүргізілуде. Айталық, қадағалау актісімен Ақсай қаласының әкімі Айымгүл Тіріжанова мен БҚО бойынша бас мемлекеттік инспекторы Ерлан Сапаров қызметтерінен босатылды. Мемлекеттік органдар басшыларының әкімшілік сыбайлас құқықбұзушылыққа баруының үш дерегі, сондай-ақ мемлекеттік қызметке кір келтіретін тәртіптік теріс қылықтың 30 дерегі, соның 13-і меморгандар басшыларының іс-әрекетінде орын алғандығы анықталды.