ОРАЛ. ҚазАқпарат – Батыс Қазақстан облысында Ресейден келген тағы бір тұрғыннан коронавирус анықталды, деп хабарлайды ҚазАқпарат тілшісі.
БҚО-ның шұғыл штабы мәлім еткеніндей, Ресейде вахталық әдіспен жасайтын облыс тұрғыны 40 жаста.
Саратов облысымен шектесетін «Тасқала» автоөткеліндегі санитарлық-карантиндік бекеттен өткен кезде оның денсаулығына ешқандай шағымы болмаған. Алайда карантиндік стационарда зерттеу қорытындысымен COVID- 19 диагнозы нақтыланды.
«Қазіргі таңда науқастың жағдайы қанағаттанарлық. Облыстық жұқпалы аурулар ауруханасына жатқызылды. Онымен қарым-қатынаста болғандар анықталып, барлығы медициналық бақылауға алынды. Ауру ошағында дезинфекциялық жұмыстар жүргізілді», деп хабарлады шұғыл штабтан.
Осылайша өңірде сырқаттанғандар саны 33-ке жетіп, соның екеуі жазылып шықты.
Еске сала кетейік, бұдан бұрын БҚО-да соңғы екі науқастың Ресейден келгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).