ОРАЛ. KAZINFORM — «Дәрмек» және «Құқықтық тәртіп» жедел алдын алу іс-шаралары барысында БҚО ПД есірткі қылмысына қарсы іс-қимыл басқармасының қызметкерлері жас жігітті ұстады.
БҚО полиция департаментінің баспасөз қызметінен мәлім еткеніндей, 28 жастағы шетел азаматы жалға алынған коттеджде қолға түсті. Ол есірткі құралдарын таратуға арналған интернет-дүкенді ұйымдастырды деген күдікке ілінді.
Жеке тінту кезінде одан ашық қоңыр түсті ұнтақ зат салынған екі орама тәркіленді.
Сонымен қатар коттеджді тінту барысында осындай зат салынған ZIP-пакет, iPhone 11 телефоны және синтетикалық есірткі таратуға пайдаланылған болуы мүмкін материалдары бар Acer ноутбук табылды.
— Сараптама тәркіленген заттың жалпы салмағы 2,62 грамм мефедрон екенін анықтады. Аталған дерек бойынша қылмыстық іс қозғалып, тергеу амалдары жүргізіліп жатыр, — деп хабарлады ведомстводан.
Еске сала кетейік, бұдан бұрын БҚО-да 17 жастағы студенттің есірткі таратумен айналысқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).