ОРАЛ. ҚазАқпарат - Бүгін сағат 11.08-де Қазталов ауданы Тереңкөл ауылдық округіне қарасты Минаж қыстағы маңында мал бағып жүрген 2001 жылғы баланың Сарыөзенге кетіп қалғаны жөнінде мәлімет түскен, деп хабарлайды «ҚазАқпарат» тілшісі.
Баланың жанында ешкім болмаған, киімі өзен жағасында қалған.
«Орал қаласынан келген сүңгуірлер баланың денесін іздестіруде. Әлі табылған жоқ», деді «ҚазАқпарат» тілшісіне кешкісін аудандық ТЖ бөлімінің бастығы Абай Нәсіпов.
Еске сала кетейік, кеше сағат 18.10 шамасында Ақжайық ауданы орталығы Чапаев ауылы тұсында Жайық өзеніне 1999 жылғы Н. деген тұрғын батып кеткен болатын.
Биыл осыған дейін облыста төрт адам суға кетсе, соның үшеуі кәмелетке толмағандар болып отыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).