БҚО-да «Тәуелсіздікке тарту» жобасы қорытындыланды

ОРАЛ. ҚазАқпарат - Оралдағы Қадыр Мырза Әли атындағы мәдениет және өнер орталығында ҚР Тәуелсіздігінің 25 жылдығына арналған «Тәуелсіздікке тарту» жобасы аясында аудандар суретшілері мен қолөнер шеберлерінің көрмесі қорытындыланды, деп хабарлайды ҚазАқпарат.

Қадыр орталығынан түскен мәліметке қарағанда, жыл басынан бері әр ауданнан үздік жұмыстар көрмесі ұйымдастырылған болатын. Ай сайын әрбір аудандағы мектептен тыс жұмыс, балалар шығармашылығы орталықтарының шәкірттері өз туындыларын жұртшылық назарына ұсынды.

 

Бұл жолы әр аудан және қала суретшілерінің жұмыстарынан үздіктері таңдалып алынып, айтулы мереке қарсаңында көрмеге қойылды.

 

Шарадан сырт қалмай, өз еңбектерін ұсынған аудан және қала суретшілері мен қолөнер шеберлеріне облыстық мәдениет, мұрағаттар және құжаттама басқармасының, сонымен қатар Қазақстан Суретшілер одағы облыстық филиалының (төрағасы Қайыр Оразғалиев) атынан алғысхаттар табысталды. Үздік шыққан туындылардың авторларына сыйлықтар берілді. Сондай-ақ әрбір көрменің ашылуы жайында жарыса хабар беріп, жаңалық жаршысы болған бұқаралық ақпарат құралдары ұжымдары да марапатталды.

 

Шара соңында Қадыр орталығының директоры Бауыржан Халиолла жиналғандарды Тәуелсіздіктің торқалы тойымен құттықтап, көрмені ұйымдастыруға атсалысқандардың бәріне алғысын білдірді.