ОРАЛ. ҚазАқпарат - Бүгін Батыс Қазақстан облыстық тарихи-өлкетану музейінде Тәуелсіздіктің 25 жылдығына орай қолға алынған «Жауқазын - 2016» жобасы аясында Ақжайық ауданы балалар шығармашылығы орталығы суретшілері мен қолөнер шеберлерінің «Ұлы елдің ұланымыз» атты көрмесі ашылды.
Мұражай қызметкерлерінің айтуынша, бұл - таңдаулы туындыларын ұсынып отырған алғашқы аудан. Тәуелсіздік тойына орай 25 жас дарынды анықтауды мақсат еткен жобаға барлық ауданнан үміткерлер қатысып, шара желтоқсан айында қорытындыланатын болады.
Көрменің ашылу рәсіміне қатысқан Ақжайық ауданы әкімінің орынбасары Меңзипа Жұматованың атап өткеніндей, аталмыш жоба ел ішіндегі талантты жастарды тауып, еңбектерін елеп, ынта-жігерлерін арттыруға септесетіні анық.
Ақжайық ауданының көрмесінде қазақ халқының ұлттық салт-дәстүрі мен мәдениетіне, тәуелсіз елдің бел-белестеріне қатысты кескіндеме, графика, мүсін, фотосуреттер, зергерлік, сәндік-қолданбалы және ағаш, киізден жасалған түрлі бұйымдар қойылған. Көрме 8 сәуірге дейін жұмыс жасамақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).