ОРАЛ. KAZINFORM — Батыс Қазақстан облысы Жаңақала ауданында адам өліміне соқтырған оқиға болды.
БҚО Полиция департаментінің баспасөз қызметінен мәлім еткеніндей, 30 наурыз күні Жаңақала ауылында екі ер адам сөзге келіп, соңы төбелеске ұласқан.
- Алған жарақаты салдарынан 30 жастағы жігіт оқиға орнында көз жұмды. Аталған дерек бойынша қылмыстық іс қозғалып, тергеу амалдары жүргізіліп жатыр. Күдікті уақытша ұстау изоляторына қамалды, - деп хабарлады ведомстводан.
БҚО Денсаулық сақтау басқармасы баспасөз қызметінің нақтылауынша, марқұм жедел жәрдем бригадасы жеткенше қайтыс болып кеткен.
Тұрғындардың сөзіне қарағанда, қанды оқиға дүкендердің бірінде болған.
Еске сала кетейік, бұдан бұрын БҚО-да аудан әкімдігіндегі төбелестен ауыр жарақат алған ер адамның палатаға шығарылғанын жазған едік.
Сондай-ақ Оралда жеңіл көлік қағып кеткен әйел көз жұмды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).