ОРАЛ. KAZINFORM - Батыс Қазақстан облысында трактормен полиция қызметкері қағып кеткен ер адам каза тапты.
БҚО полиция департаментінің баспасөз қызметінен мәлім еткеніндей, оқиға Сырым ауданы Бұлдырты ауылында болды.
Жүргізуші «МТЗ-80» тракторымен артқа қарай жүрген кезде абайсызда 1979 жылғы ер адамды басып кеткен. Марқұм оқиға орнында көз жұмды.
«Аталған дерек бойынша ҚР ҚК 345-бабына сәйкес сотқа дейінгі тергеу амалдары жүргізілуде. Жүргізуші алдымен уақытша ұстау изоляторына қамалды. Қазіргі кезде ол сот қаулысымен үй қамағында отыр. Трактордың рулінде аудандық полиция бөлімінің қызметкері отырған. Ол кезекті еңбек демалысында болған. Сараптама қорытындысына сәйкес полицей ішімдік ішпеген. Ол ішкі істер органынан қуылды», деп хабарлады ведомстводан.
Еске сала кетейік, бұдан бұрын Орал қаласының тұрғыны саяжай шатырында есірткі зертханасын ұйымдастырғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).