ОРАЛ. ҚазАқпарат – Батыс Қазақстан облысында түнде жоғалып кеткен балықшы аман-есен табылды, деп хабарлайды ҚазАқпарат тілшісі.
БҚО ТЖ департаментінің баспасөз қызметі мәлім еткеніндей, оқиға Ақжайық ауданында болды.
9 қараша күні сағат 06.55-те балықшының жоғалып кеткені жөнінде хабар түскен. Ол Алғабас ауылынан 30 шақырым жерде орналасқан Киров су қоймасында түнде қайықпен кеткеннен оралмаған.
Құтқарушылар сағат 13:05-те балықшыны қамыстың арасынан тауып, жәрдем көрсетіп, жылытты.
Балықшы жедел қимылдап, өзін құтқарған ТЖ қызметкерлеріне алғысын білдірді.
Биыл өңірде 3 балықшы суға кетіп, алтауы құтқарылды. Өткен жылы осы кезеңде 8 балықшы суға кетіп, екеуі құтқарылған болатын.
БҚО ТЖ департаменті адам қазасына жол бермеу мақсатында су айдындарында қауіпсіздік ережелерін сақтау керектігін ескертеді.
Еске сала кетейік, бұдан бұрын БҚО-да қатты желден көлдің ортасына кетіп қалған екі балықшының құтқарылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).