ОРАЛ. ҚазАқпарат – Батыс Қазақстан облысында тұрғын үйден өрт шығып, 45 адам эвакуацияланды, деп хабарлайды ҚазАқпарат тілшісі.
БҚО Төтенше жағдайлар департаментінің баспасөз қызметінен түскен мәліметке қарағанда, оқиға кеше сағат 17.30 шамасында болды.
Бәйтерек ауданы, Дариян ауылының М.Шолохов көшесінде қос қабатты 8 пәтерлі үй өртенген. №8 пәтердің төбесі мен ондағы жеке заттар отқа оранған. Жалын шарпыған аумақ 60 шаршы метрді құрағандықтан, қосымша күштер шақырылды.
Тұрғын үйден 45 адам қауіпсіз жерге шығарылды, соның 10-ы – балалар.
Тілсіз жауды ауыздықтауға 10 адам, 3 техника жұмылдырылды.
Өрт 18.30-да оқшауланып, 19.54-те толығымен сөндірілді.
Қазіргі кезде өрттің шығу себебі, кінәлі адамдар, келтірілген шығын анықталуда.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).