БҚО-да үздік учаскелік полиция инспекторы белгілі болды
Облыстық полиция департаментінің баспасөз қызметінен түскен мәліметке қарағанда, «Үздік учаскелік инспектор» байқауы тәртіп сақшыларының беделін көтеру және оларды ынталандыру мақсатында ұйымдастырылды.
Байқаудың бірінші сатысында аумақтық бөлімшелерде үздіктер анықталды.
Финалдық сайысқа 13 учаскелік инспектор қатысып, олардың қызмет бабындағы нәтижелері ғана емес, адамгершілік және іскерлік қарым-қабілеттері ескерілді.
Инспекторлар атыс және дене дайындығынан, сондай-ақ нормативтік-құқықтық актілерді білу деңгейінен сынға түсті.
Байқау қорытындысында Орал қаласы полиция басқармасы жергілікті полиция қызметі бөлімінің учаскелік инспекторы, полиция майоры Талғат Өксімбаев жеңімпаз атанды.
Талғат Жұмагерейұлы ішкі істер органдарында 20 жылдан астам уақыт бойы қызмет етеді. Енді ол шілде айында Нұр-Сұлтан қаласында өтетін республикалық байқауда бақ сынайды.