ОРАЛ. ҚазАқпарат - Батыс Қазақстан облысында заңсыз аң аулаған үш тұрғын сотталды, деп хабарлайды ҚазАқпарат тілшісі.
БҚО прокуратурасының баспасөз қызметінен түскен мәліметке қарағанда, биылғы 16 маусымда Бөрлі ауданы полициясы «Audi» автокөлігімен Кирсанов мемлекеттік қорықжайына барып, ерекше қорғалатын елік жануарын атып алған үш жігітті қолға түсірген.
Аудан прокуратурасы қылмысты дәлелдеп, соған орай сот отырысы барысында сотталушылар прокурормен процестік келісім жасауға ұсыныс берді.
Сот үкімімен Ақсай қаласының үш тұрғынына ҚР ҚК 337-бабы 4-бөлігі 1-тармағына сәйкес заңсыз аңшылық жасағаны 600 сағат түзеу жұмысы белгіленіп, 1,8 млн теңге материалдық шығын өндірілді. Сондай-ақ қару мен автокөлік қылмыс құралы ретінде мемлекет меншігіне тәркіленді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).