ОРАЛ. ҚазАқпарат - Батыс Қазақстан облысында киіктерді заңсыз атып алған азаматқа қатысты сот үкімі шықты, деп хабарлайды ҚазАқпарат тілшісі.
БҚО прокуратурасының баспасөз қызметінен түскен мәліметке қарағанда, Р.Щербинин биылғы қыркүйек айында Тасқала ауданы Мереке ауылдық округіне қарасты Аққұс қыстағының маңында заңсыз бес киік атып алған. Көп ұзамай ол киіктердің тұтас етімен Тасқала ауылының тұсында ішкі істер органы мен прокуратура қызметкерлерінің қолына түсті.
Тасқала аудандық сотының үкімімен ҚР ҚК 337-бабы 4-бөлімі 2, 4-тармақтарына сәйкес, Р.Щербинин айыпты деп танылды. Оған 3 жылға аң аулау құқығынан айырумен бірге 2 жыл 6 айға бас бостандығын шектеу жазасы тағайындалды.
2 386,125 мың теңге материалдық залалдың толық көлемде өндірілуіне байланысты прокурормен айыпталушының кінәсін мойындау туралы процессуалдық келісім жасалды.
Сот үкімі заңды күшіне енген жоқ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).