ОРАЛ. ҚазАқпарат - Батыс Қазақстан облысында заңсыз киік аулаумен айналысқан браконьер ұсталды, деп хабарлайды ҚазАқпарат тілшісі.
ҚР АШМ Орман шаруашылығы және жануарлар әлемі комитетінің баспасөз хатшысы Сәкен Ділдәхметтің Фейсбуктегі парақшасында жазғанындай, 22 шілде күні «Охотзоопром» ӨБ» РМҚК Батыс аймақтық филиалының инспекторлары Қазталов ауданы Тереңкөл ауылдық округінде 1982 жылғы И.М. деген азамат айдаған «Фольксваген Пассат» автокөлігін тоқтатты.
Тексеру барысында автокөліктен екі ұңғылы 12 калибрлі мылтық, 12 калибрлі 26 дана оқ-дәрі, 12 калибрлі 1 дана гильза, бір қолды ара және 4 дана киіктің мүйіздері табылды.
Аталмыш дерек Қазталов аудандық ішкі істер бөлімінде тіркеліп, ҚР Қылмыстық Кодексінің 339-бабы бойынша қылмыстық іс қозғалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).