ОРАЛ. ҚазАқпарат – Батыс Қазақстан облысында жасөспірімнің өлімі бойынша қылмыстық іс қозғалды, деп хабарлайды ҚазАқпарат тілшісі.
ҚазАқпарат бұдан бұрын жазғанындай, Оралда жасөспірімнің өлімі бойынша 14 жастағы бала ұсталған болатын.
БҚО полиция департаменті баспасөз қызметінің нақтылауынша, қазіргі кезде ҚР ҚК 106-бабы 3-бөлігіне (абайсызда жәбірленушінің өліміне әкеп соққан денсаулыққа қасақана ауыр зиян келтіру) сәйкес сотқа дейінгі тергеу амалдары жалғасуда.
«Қылмыстық іс бойынша әлі де сараптама жүргізіледі. Аталған бап бойынша айыпты деп танылған адам мүлкi тәркiленіп немесе онсыз, сегіз жылдан он екі жылға дейiнгі мерзiмге бас бостандығынан айыруға жазаланады», деп хабарлады ведомстводан.
Оқиға 28 мамырға қараған түні Орал қаласына жақын орналасқан Бәйтерек ауданы Щапов ауылында болған. Соққы алған 15 жасар бала облыстық көпбейінді балалар ауруханасына жеткізілгенмен, есін жимастан көз жұмды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).