БҚО-да жедел жәрдем фельдшерлері 60 жастағы ер адамның өмірін сақтап қалды
ОРАЛ. KAZINFORM – Облыстық жедел жәрдем станциясының фельдшерлері клиникалық өлім жағдайына тап болған ер адамды ажалдан аман алып қалды.
Фото: БҚО Денсаулық сақтау басқармасы
БҚО Денсаулық сақтау басқармасының баспасөз қызметінен мәлім еткеніндей, диспетчерлік бөлімшеге 1964 жылғы ер адамға қатысты жүрек ауруы шағымымен шақырту түскен.
Фото: БҚО Денсаулық сақтау басқармасы
Аталған шақырту бойынша медициналық көмек көрсету кезінде науқас кенеттен клиникалық өлімге ұшыраған. Фельдшерлер Н.Ешімов пен Д.Семғалиева дереу жүрек-өкпе реанимациясына кірісті.
- Жедел жәрдем қызметкерлерінің дұрыс және уақытылы әрекеттері арқасында пациенттің өз бетінше тыныс алу жүйесі және жүрек қызметі қалпына келтірілді. Бұдан соң жедел жәрдем бригадасымен науқас облыстық кардиологиялық орталыққа аман-есен жеткізілді. Қазіргі таңда ер адам тиісті ем қабылдап жатыр, жақын арада ауруханадан үйіне жіберілетін болады, - деп хабарлады ведомстводан.
Еске сала кетейік, бұдан бұрын Оралда жедел жәрдем көлігі апатқа ұшырап, 3 адамның зардап шеккенін жазған болатынбыз.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).