ОРАЛ. KAZINFORM — Батыс Қазақстан облысында Ақтөбе-Орал жолындағы оқиғадан тағы бір адам қайтыс болды.
БҚО денсаулық сақтау басқармасы баспасөз қызметінің мәлім еткеніндей, Шыңғырлау ауданы Алмаз ауылынан 5 шақырым қашықтықта 22 наурыз күні болған жол-көлік оқиғасынан 1994 жылғы ер адам жедел жәрдем жеткенше, көз жұмған.
Сағат 06:22-де екі ер адам Сырым аудандық ауруханасына жеткізілді. 1993 жылғы ер адам алған жарақаттары салдарынан ауруханада қайтты. Жеңіл көлікте болған 1993 және 1994 жылғы жігіттер — тәжікстандық азаматтар.
— Облыс орталығынан шақыртылған санавиациямен 1963 жылғы ер адам (автобус жүргізушісі) қалалық көпбейінді ауруханаға жеткізілді. Түркістан облысының тұрғыны бүгін таңғы сағат 08:55-те о дүниелік болды, — деп хабарлады ведомстводан.
Еске сала кетейік, бұдан бұрын БҚО-да жеңіл көлік автобуспен түйісіп, екі адамның көз жұмғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).