ОРАЛ. ҚазАқпарат - Бүгін сағат 11.30 шамасында Қаратөбе ауданы Қаратөбе ауылдық округіне қарасты Үркіш қыстағынан 4 шақырым жерден ер адамның мүрдесі табылды, деп хабарлайды «ҚазАқпарат» ХАА тілшісі.
Аудандық ТЖ бөлімінің аға инженері, азаматтық қорғау майоры Мэлс Ысқақовтың айтуынша, Н. есімді ер адам 1981 жылғы болса, бұдан бұрын мүрдесі табылған Ә. есімді әйел 1973 жылы дүниеге келген. Олар 14 ақпан күні Қаратөбе ауылынан 14 шақырым жердегі Үркіш қыстағынан шығып, содан жоғалып кеткен еді. Осыған байланысты БҚО ТЖ департаменті жедел құтқару жасағының бас құтқарушысы Алтай Болатұлы бастаған, құрамында кинолог бар топ Оралдан арнайы барып, іздестірген болатын.
Марқұмдардың денелері сот-медициналық сараптамаға жіберіледі.
Еске сала кетейік, бұдан бұрын 1 ақпан күні Ақжайық ауданында Жаңабұлақ ауылдық округінің боранда үсіп кеткен 1966 жылғы тұрғынының денесі табылған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).