ОРАЛ. KAZINFORM – Сырым аудандық сотында жол апаты салдарынан адам қаза болып, жол-көлік апатына қатысы бар жүргізушіге қатысты үкім шықты.
БҚО сотының баспасөз қызметінен мәлім еткеніндей, жеңіл көлік айдап келе жатқан жүргізуші жүк көлігімен соқтығысқан.
Салдарынан жеңіл автокөлікте отырған жолаушы көз жұмған.
- Сот сотталушының кінәсін толық мойындағанын, бірінші рет абайсызда қылмыс жасағанын қылмыстық жауаптылық пен жазаны жеңiлдететiн мән-жай ретінде ескерді. Сот үкімі бойынша аталған тұрғын ҚК 345-бабы 3-бөлігіне сәйкес айыпты деп танылып, оған 2 жыл 6 ай мерзімге бас бостандығынан айыру жазасы кесілді. Сонымен қатар ол 5 жыл мерзімге көлік құралын басқару құқығынан айырылды. Үкім заңды күшіне енген жоқ, - деп хабарлады ведомстводан.
Еске сала кетейік, бұдан бұрын БҚО әкімдігінің бұрынғы қызметкері қамауға алынғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).