ОРАЛ. ҚазАқпарат - 2 маусым күні сағат 18.40 шамасында Орал-Ақсай күре жолының 77-шақырымында (Бөрлі ауданында) қос бірдей «Фольксваген Шаран» автокөлігінің соқтығысуынан болған ірі жол апаты салдарынан тағы бір адам көз жұмды, деп хабарлайды «ҚазАқпарат» тілшісі.
БҚО ішкі істер департаментінің баспасөз қызметінен түскен мәліметке қарағанда, жүргізушінің бірі автокөлік руліне ие бола алмай, қарсы бетке шығып кетіп, екінші көлікпен түйісуге жол берген. Жантүршігерлік жол апатынан үш адам қаза тапса, тоғызы түрлі жарақатпен Ақсай қаласы мен Теректі ауданы орталығы Федоров ауылындағы аудандық ауруханаларға жеткізілген. Содан кейін сағат 22.55-те зардап шеккендердің бірі, 1975 жылғы әйел көз жұмған.
Аталған дерек ҚР ҚК 345-бабы 4-бөліміне сәйкес сотқа дейінгі тергеп-тексерудің бірыңғай тізіліміне тіркеліп, тергеу амалдары жүргізілуде.
Еске сала кетейік, аталмыш оқиға туралы бұдан бұрын «ҚазАқпарат» хабарлаған болатын .
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).