ОРАЛ. ҚазАқпарат – Батыс Қазақстан облысында жол ережесін 61 рет бұзған Өзбекстан азаматы ұсталды, ол 1 млн теңгеден астам айыппұл төлейді, деп хабарлайды ҚазАқпарат тілшісі.
БҚО полиция департаменті баспасөз қызметінен түскен мәліметке қарағанда, әкімшілік құқық бұзушылық істері бойынша жазаның бұлтартпау қағидатын қамтамасыз ету мақсатында Орал қаласында 7-30 маусым аралығында республикалық «Борышкер» жедел алдын алу іс-шарасы өткізіліп жатыр.
«Соның барысында өзбекстандық азаматтың жол қозғалысы ережесін 61 рет бұзып, 1 млн 173 мың теңге айыппұл «арқалағаны» анықталды. Аталған жүргізуші айдап келе жатқан Ресей Федерациясында тіркелген «ВАЗ-2110» автокөлігі тоқтатылып, арнайы айыптұраққа қойылды. БҚО полиция департаменті жүргізушілерге жол қозғалысы ережесін қатаң сақтап, айыппұлдарын уақтылы төлеу керектігін еске салады», - деп хабарлады ведомстводан.
Еске сала кетейік, бұдан бұрын Оралда жарық сөніп, бағдаршам істен шыққанда полицей көліктерге газетпен бағыт бергенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).