БҚО-дан Рио олимпиадасына төрт спортшы қатысады
Кеше облыс әкімі Алтай Көлгінов алдағы дүбірлі додада байдарка мен каноэдан сынға түсетін Алексей Дергунов пен Андрей Ергучевті және спортшылардың бапкері, 1986 жылғы әлем чемпионы Александр Акунишниковті қабылдап, оларға сәттілік тіледі. Өңір басшысы Қазақстанда ел намысын қорғайтын барлық спортшыларға жағдай жасалып отырғанын атап өтті.
А.Дергунов пен А.Ергучевтен басқа Риоға өңірден спорттық жүріс шебері Георгий Шейко мен балуан қыз Екатерина Ларионова барады. Осылардың ішінде, әсіресе, әйелдер күресінен көптеген жарыстарда олжа салған, мысалы, 2014 жылғы әлем чемпионатының қола жүлдегері атанған Е.Ларионовадан үміт мол.
Еске сала кетейік, Лондон олимпиадасында Батыс Қазақстан облысынан алты спортшы өнер көрсетіп, соның ішінде Даниял Гаджиев грек-рим күресінен қола жүлдені иеленген болатын.