ОРАЛ. ҚазАқпарат - Батыс Қазақстан облыстық мәслихатының депутаттары Зеленов ауданының атауын өзгерту туралы ұсынысты қолдады, деп хабарлайды ҚазАқпарат тілшісі.
Облыстық тілдерді дамыту басқармасының басшысы Айгүл Мыңбаеваның айтуынша, ауданның 22 ауылдық округі мен аудан орталығында Зеленов ауданының атауын Бәйтерек деп атау жөнінде ұсыныс талқыланып, ол көпшілік тарапынан қолдау тапты.
Сонымен қатар аудандық тұрақты комиссия мұны бірауыздан қуаттап, Зеленов ауданы әкімдігі мен мәслихаты біріккен қаулы мен шешім қабылдады.
Ұсынысты облыстық мәслихат депутаттары да мақұлдады.
«Енді Үкімет жанындағы республикалық ономастикалық комиссияның қарауына облыс әкімдігі мен мәслихаттың біріккен қаулысы және шешімі жіберіледі», - деді А.Мыңбаева.
Айта кетейік, Зеленов - облыстағы ірілендірілген ауданның бірі. 1997 жылы оған бұрынғы Приурал ауданы да кірді. Зеленов Ресейдің Самара облысы Большечернигов, Орынбордың Первомай, Ташла, Саратовтың Озинки, Перелюб аудандарымен шектеседі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).