БҚО халқы әскери шеруді тікелей эфирден тамашалады
ОРАЛ. KAZINFORM — Бүгін Орал қаласындағы «Жайық Арена» спорт кешенінде өңір тұрғындары Астана қаласында ұйымдастырылған Отан қорғаушылар күніне арналған әскери шеруді тікелей эфир арқылы тамашалады.
Салтанатты шара көрсетілімін тамашалуға 1200 адам жиналды. Шерудің көрсетілімі алдында жергілікті өнерпаздар — DDRECORDS тобының мүшелері арнайы концерттік бағдарлама ұсынды. Олар көрермендерге патриоттық рухтағы әндер мен көтеріңкі көңіл күй сыйлауды мақсат етеді.
Бұл бастама — жас ұрпақты отансүйгіштікке тәрбиелеу, әскери-патриоттық сана қалыптастыру жолындағы маңызды қадамдардың бірі.
Айта кетейік, Отан қорғаушылар күні — ел Тәуелсіздігі мен қауіпсіздігін қамтамасыз ету жолында аянбай еңбек етіп жүрген ерлердің ерлігіне тағзым ететін ерекше күн. Шерудің тікелей көрсетілімі — осы мерекенің мәні мен маңызын кеңінен насихаттауға бағытталған.