ОРАЛ. ҚазАқпарат - Алғыс айту күніне орай кеше БҚО тарихи-өлкетану музейінде Қазақстан халқы Ассамблеясының және Қазақстанның полиэтностығының тарихы залы ашылды.
Ашылу рәсіміне облыс әкімінің орынбасары Бақтияр Мәкен бастаған өңірдегі этномәдени бірлестіктер басшылары мен өкілдері, студент жастар қатысты.
Ассамблея залында қазақ, орыс, корей, әзербайжан, ұйғыр, татар, украин және басқа халықтардың ұлттық киімдері мен бұйымдары, мұрағат құжаттары, музыка аспаптары, көне кітаптар, барлығы 100-ден астам құнды жәдігерлер қойылған.
Корей этномәдени бірлестігінің төрағасы Максим Пак Орал қаласында орнатылған «Қазақ халқына мың алғыс» монументінің көшірме мүсінін музейге табыс етті.
Музей директоры Мирболат Ерсаевтың айтуынша, ассамблея залы тұрақты жұмыс жасап, жаңа жәдігерлермен толықтырылып тұратын болады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).