ОРАЛ. 9 наурыз. ҚазАқпарат - Халықаралық әйелдер күніне орай БҚО тарихи-өлкетану мұражайында «Көктем өрнектері» көрмесі ұйымдастырылды.
Онда негізінен ХІХ және ХХ ғасыр басында әйелдер тұтынған түрлі бұйымдар қойылған.
Мұражайдың көрме залында 50-ден астам айна, орамал, дастархан, көйлек сынды бұйымдарға орын берілген. Көрмеде өңірдің танымал адамдары сыйға берген тарту-таралғылар да бар. Мәселен, Мәжіліс депутаты Елена Тарасенко орынборлық түбіт орамалды сыйласа, белгілі сәнгер Ақкенже Девятко Париж сән апталығында көрсетілген көйлекті тарту еткен. Сонымен қатар екінші қабаттың холында әйел суретшілердің түрлі халықаралық байқауларда атап өтілген туындылары қойылған.
Мұражайдың бас қор сақтаушысы Марина Мырзағалиеваның сөзіне қарағанда, қорда тарихи мәнге ие 100 мыңнан астам бұйым бар. Көрме залы экспонаттары ай сайын жаңартылып отырады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).