ОРАЛ. ҚазАқпарат - «Б» корпусының мемлекеттік әкімшілік қызметшілеріне ротация жүргізу жоспарына сәйкес, Батыс Қазақстан облыстық тілдерді дамыту басқармасы басшысы лауазымына Айгүл Әділгерейқызы Мыңбаева тағайындалды, деп хабарлайды «ҚазАқпарат» тілшісі.
Облыс әкімінің бірінші орынбасары Арман Өтеғұлов жаңа басшыны басқарма ұжымына таныстырып, қызметіне сәттілік тіледі.
Бұған дейін БҚО білім басқармасына жетекшілік еткен А.Ә.Мыңбаева 1963 жылы дүниеге келген, білімі жоғары, 1985 жылы педагогикалық институтты бітірген. 1985-2000 жылдары орта және кәсіптік білім беру мекемелерінде ұстаздық қызмет еткен Айгүл Әділгерейқызы 2000 жылдан бері БҚО білім басқармасында жетекші маманнан бастап басшы лауазымына дейн көтерілді. 37 жылдық еңбек өтілінің 17 жылын мемлекеттік қызметке арнаған ол өзін ұйымдастырушылық қабілеті мол, білікті маман ретінде көрсете білді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).