ОРАЛ. ҚазАқпарат – Батыс Қазақстан облысында ауыл тұрғыны киік мүйізімен ұсталды, деп хабарлайды ҚазАқпарат тілшісі.
«Охотзоопром» ӨБ» РМҚК мәліметіне қарағанда, оқиға 3 ақпан күні Жәнібек ауданы аумағында болған.
Аталған мекеме инспекторлары сағат 00.05 шамасында Күйгенкөл ауылдық округі Құрсай елді мекенінде атпен жүрген азаматты қолға түсірді.
Оның «Nike» деген жазуы бар спорттық қызыл-қара түсті сөмкесінен 12 дана киік мүйізі табылды.
Оқиға орнына Жәнібек ауданы полиция бөлімінің жедел тергеу тобы шақырылды.
Қазіргі кезде ҚР ҚК 339-бабы 1-бөлігіне сәйкес (өсiмдiктердің немесе жануарлардың сирек кездесетiн және құрып кету қаупi төнген, сондай-ақ пайдалануға тыйым салынған түрлерімен, олардың бөліктерімен немесе дериваттарымен заңсыз айналысу) қылмыстық іс қозғалып, тергеу амалдары жүргізілуде.
Еске сала кетейік, бұдан бұрын БҚО-да мүйіздері кесілген 50-ге жуық киік ұшасы табылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).