ОРАЛ. ҚазАқпарат - Батыс Қазақстан облысында тұрғын мас күйінде көлігін соқтырып қана қоймай, қамалып тынды, деп хабарлайды ҚазАқпарат тілшісі.
БҚО сотының баспасөз қызметінен түскен мәліметке қарағанда, Қазталов аудандық №2 соты азамат К-ға қатысты ҚР Әкімшілік құқықбұзушылық кодексі 608-бабы 7-бөлігіне сәйкес қозғалған іске нүкте қойды.
Сотта анықталғандай, Жалпақтал ауылында тұратын К. бұдан бұрын да ҚР Әкімшілік құқықбұзушылық кодексі 608-бабы 6-бөлігіне сәйкес жауапкершілікке тартылып, көлік құралдарын басқару құқығынан айырылған. Соны біле тұра, 16 қазан күні «ВАЗ» көлігінің руліне масаң күйде отырып, Байқоңыр көшесінде қарсы бетте Н. деген азамат айдап келе жатқан «Ладамен» соқтығысуға жол берген. Соның салдарынан екі көлік те бүлінген. Мұндай жол-көлік оқиғасын бір жыл ішінде қайталап жасаған.
Сотта жауапқа тартылушы кінәсін мойындап, өкінетінін айтты.
Сот К-ны ҚР Әкімшілік құқықбұзушылық кодексі 608-бабы 7-бөлігіне сәйкес айыпты деп тауып, оны 30 тәулікке қамауға қаулы етті.
Сот қаулысы күшіне енген жоқ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).