АСТАНА. ҚазАқпарат - Хельсинки қаласында Еуропаның ең күшті боксшылары қатысқан GeeBee турниріне қазақстандық боксшылар да қатысып, соның ішінде Данияр Елеусінов пен Василий Левит чемпион атанды.
ҚР Мәдениет және спорт министрлігі Спорт және дене шынықтыру істері комитетінің баспасөз хатшысы Бақытбек Хамиттің хабарлауынша, Қазақстан ұлттық құрамасының капитаны Данияр Елеусінов әуелі швед Оливер Флодин, сосын француз Сулейман Чисоконы 3:0 есебімен ұтты. Финалда Еуропа чемпионы, литвалық Эймантис Станионисті 2:1 есебімен тізе бүктірген Данияр өзінің 25-ке толған туған күнінде жеңіс тұғырына көтерілді.
Василий Левит те алғашқы екі кездесуін Уэльс елінің өкілі Коди Дэвис пен фин Тони Хонканы 3:0 есебімен жеңді. Финалда ирландық Даррен О'Нил жарақатына байланысты рингке шығудан бас тартты.
Осы жарысқа олимпиада лицензиясын иеленген Біржан Жақыпов пен Берік Әбдрахманов та қатысқан болатын, бірақ олар сәтті өнер көрсете алған жоқ. Бұл турнир, бір жағынан, олимпиада жолдамасын еншілеген қазақстандық боксшылар үшін жылдың басты жарысына дайындық есебінде болды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).