18:21, 05 Мамыр 2023

Бокстан ӘЧ: Серік Теміржанов алғашқы жеңісі жөнінде пікір білдірді

ТАШКЕНТ. ҚазАқпарат - Өзбекстан астанасы Ташкент қаласында өтіп жатқан әлем чемпионатының бесінші жарыс күнінде жеңіске жеткен Серік Теміржанов (57 келі) жекпе-жегі жөнінде пікір білдірді, деп хабарлайды ҚазАқпарат тілшісі.

Фото: instagram.com/boxingkazakhstan

Қазақстандық спортшы 1/16 финалда Мали елінен келген Абдул Карим Батилидің осал тұсын тапты.

«Маған жанкүйерлік жасаған барша азаматтарға рақмет айтамын. Алғашқы жекпе-жегімде жеңіске жеттім. Мақсатым - әлем чемпионы болу. Жақсы дайындық өткіздік. Аға және жеке бапкерлеріммен ақылдасып, осы мақсатта тактика ұйымдастырдық. Оған бар күшімізді саламыз», - деді С.Теміржанов.

Енді ел құрамасынан бүгін 19:00-де басталатын кешкі сессияда Нұрбек Оралбай (80 келі) әзербайжандық Мұрад Аллахвердиевпен кездессе, Айбек Оралбай (92 келі) италиялық Азиз Аббес Мухийдинмен қолғап түйістіреді.

Айта кетсек, қазірге дейін ел құрамасынан Талғат Сырымбетов (60 келі) пен Санатәли Төлтаев (63,5 келі) жарыс жолынан шығып қалды.

Бокс Спорт Қоғам

Әділжан Үмбет

1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді. 2015-2020 жылдарда «Ақмешіт апталығы» газетінің бас редакторы болды. Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті. 2018 жылдан бері «Kazinform» ақпарат агенттігінде Қызылорда облысындағы меншікті тілші.