БЕЛГРАД. ҚазАқпарат - Сербия астанасы Белград қаласында өтіп жатқан бокстан әлем чемпионатында қазақстандық Асланбек Шымбергенов кезекті жекпе-жегін сәтті өткізді, деп хабарлайды ҚазАқпарат тілшісі.
Қазақстандық боксшы 1/8 финалда71 келі салмақта германиялық Магомед Шахидовпен кездесті. Бұл - Асланбектің үшінші жекпе-жегі.
Төрешілер бірінші және екінші раундта бірауыздан Асланбектің жеңісіне қолдау білдірді. Үшінші раундта Асланбек қарсыласын нокаутқа жіберді. Нәтижесінде ол ширек финалға жолдама алды.
Ол бұдан бұрын ол иран боксшысы Фархад Моради Аташгахты, өзбек спортшысы Шахрам Гиясовты орта жолда қалдырды.
Сондай-ақ, бүгін Махмуд Сабырхан (54 келі) мен Саматәли Төлтаев (60 келі) қарсыластарын жеңіп, жарысты жалғастыруға мүмкіндік алды.
Бүгін 01:45-те Айбек Оралбай (92 келі) өзбекстандық Мадияр Саидрахимовпен шаршы алаңға шығады. Ол бұған дейін польшалық Матеуш Березницкиді жеңді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.