НҰР-СҰЛТАН. ҚазАқпарат - Польшаның Кельце қаласында өтіп жатқан жастар арасындағы әлем чемпионатында 4 қазақстандық боксшы кезекті жекпе-жегін өткізді, деп хабарлайды ҚазАқпарат Қазақстан бокс федерациясына сілтеме жасап.
Олардың арасында екеуі жеңіске жетсе, екеуі қарсыластарына есе жіберіп қойды.
Дүбірлі додада 52 келіде сынға түскен Кенже Мұратұлы өзбекстандық қарсыласы Шахзод Мұзафаровтан жеңілді. Ол бұдан бұрын шотландиялық Леннон Малллиганнан басым түскен еді.
Ал 60 келіде шаршы алаңға шыққан Елнұр Сүйінбай никарагуалық Микел Эрнандесті үшінші раундта нокдаунмен тізе бүктірді. Осылайша 1/8 финалға жолдама алды.
Тағы бір қазақстандық Нұржан Амангелдінің (69 келі) ресейлік Чеэрав Ашалаевқа шамасы келген жоқ. Қарсыласы – Еуропа чемпионатында күміс жүлдегер атанған тәжірибелі боксшы.
Ал қыздар арасында 54 келі өнер көрсеткен Айшагүл Елеубаева 1/4 финалға шықты. Үнді боксшысымен өткен жекпе-жекті төрешілер екінші раундта тоқтатып, жеңісті қазақстандық спортшыға берді.
Естеріңізге сала кетелік, жастар арасындағы әлем чемпионатына еліміз атынан 20 боксшы аттанған болатын.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.