НҰР-СҰЛТАН. ҚазАқпарат - Польшаның Кельце қаласында өтіп жатқан жастар арасындағы әлем чемпионатында бүгін бес қазақстандық жекпе-жекке шығады, деп хабарлайды ҚазАқпарат Қазақстан бокс федерациясына сілтеме жасап.
Қазақстандық былғары қолғап шеберлері күндізгі және кешкі сессияда сайысқа түседі.
Күндізгі сессия елорда уақытымен 18.00-де басталады. Алғашқы жұпта Гүлнұр Тұрапбай (51 келі) жапониялық Хикару Шинохарамен шаршы алаңға шығады. Ал жетінші жұпта Ерасыл Жакпеков (81 келі) кубалық Брайан Леон Сальгадомен қолғап түйістіреді. Он үшінші жұпта Аманат Сабырғали (91 келіден жоғары) өзбекстандық Жахонгир Зокировпен жекпе-жекке шығады.
Ал кешкі сессия елорда уақытымен 21.00-де жалғасады. Бұл жолы алтыншы жұпта Сабыржан Аққалыков (64 келі) импаниялық Фабио Маззилли Бласкомен кездеседі. Тоғызыншы жұпта Диас Молжігітов (75 келі) молдовалық Святослав Воскресенскиймен жасыл алаңға шығады.
Естеріңізге сала кетелік, жастар арасындағы әлем чемпионатына еліміз атынан 20 боксшы аттанған болатын.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.