НҰР-СҰЛТАН. ҚазАқпарат - Ресейдің Улан-Удэ қаласында өтіп жатқан бокстан қыздар арасындағы әлем чемпионатында бүгін қазақстандық Милана Сафронова ширек финалға жолдама алды, деп хабарлайды ҚазАқпарат тілшісі.
Милана Сафронова 64 келіде шаршы алаңға Ботсванадан келген Аратва Касемангпен қолғап түйістірді. Жекпе-жек барысында қазақстандық боксшының басымдығы айқын аңғарылып тұрды. Нәтижесінде төрешілер бірауыздан оның жеңіске жеткеніне ұйғарым жасады.
Естеріңізге сала кетелік, әлем чемпионатына қазақстандық он боксшы барды . Олардың арасынан 3 қазанда Назым Қызайбай (51 келі) жапон спортшысы Намики Тсукимиден, Алуа Балқыбекова (48 келі) өзбекстандық Гүласал Султоналиевадан жеңіліп қалған еді.
Алғашқы жекпе-жектерінде Айжан Қожабекова (57 келі), Римма Волосенко (60 келі), Дариға Шәкімова (69 келі), Ақерке Бақытжан (75 келі), Фариза Шолтай (81 келі) қарсыластарынан басым түсті.
Фото: www.kfb.kz
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.