БЕЛГРАД. ҚазАқпарат - Сербия астанасы Белград қаласында өтіп жатқан бокстан әлем чемпионатында бүгін Теміртас Жүсіпов алғашқы жекпе-жегін сәтті өткізді, деп хабарлайды ҚазАқпарат тілшісі.
Қазақстандық боксшы 48 келі салмақта 1/8 финалда сербиялық Омер Аметовичпен қолғап түйістірген еді.
Жекпе-жек барысында Теміртас қарсыласының осал тұсын тапты. Соққыны көбірек жұмсап, ұпай қорын молайтты. Нәтижесінде төрешілердің басым бөлігі оның жеңісіне қолдау білдірді. Ол 1/4 финалға жолдама алды.
Айта кетсек, бұдан бұрын Махмуд Сабыржан (54 келі), Саматәлі Төлтаев (60 келі), Асланбек Шымбергенов (71 келі), Нұрқанат Райс (75 келі), Айбек Оралбай (92 келі) жарысты жалғастыруға мүмкіндік алды.
Ал Бек Нұрмағамбет (86 келі) пен Нұрлан Сапарбай (92 келі) қарсыластарына жол берді.
Сондай-ақ, бүгін күндізгі сессияда Нұрбек Оралбай (80 келі) бразилиялық Исаяс Фильомен шаршы алаңға шығады.
Ал кешкі сессияда Санатәлі Төлтаев (63,5 келі) молдовалық Василий Чеботарьмен кездеседі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.