БЕЛГРАД. ҚазАқпарат - Сербия астанасы Белград қаласында өтіп жатқан бокстан әлем чемпионаты ширек финалында қазақстандық Теміртас Жүсіпов кезекті жекпе-жегін өткізді, деп хабарлайды ҚазАқпарат тілшісі.
Қазақстандық боксшы 48 келі салмақта Нодиржон Мирзахмедовпен қолғап түйістірді.
Жекпе-жек барысында Теміртас алғашқы екі раундта қарсыласына көбірек соққы жұмсады. Нәтижесінде төрешілер оның жеңгенін мойындады. Жалпы нәтиже бойынша бірауыздан қазақстандық боксшы басым түсті. Осылайша Теміртас жартылай финалға жолдама алды.
Осы ретте Теміртас Жүсіповтің ҚР Қорғаныс министрлігі Орталық спорт клубының бокстан спортшы-нұсқаушысы екенін айта кеткен жөн.
Ел құрамасынан 1/4 финалға он боксшы шықты. Олардың қатарында Теміртас Жүсіповтен басқа Сәкен Бибосынов (51 келі), Махмуд Сабырхан (54 келі), Серік Теміржанов (57 келі), Саматәли Төлтаев (60 келі), Санатали Төлтаев (63,5 келі) Абылайхан Жүсіпов (67 келі), Асланбек Шымбергенов (71 келі), Нұрқанат Райыс (75 келі) және Нұрбек Оралбай (80 келі) бүгін шаршы алаңға шығады .
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.