Бокстан әлем кубогі: Назым Қызайбай алғашқы жекпе-жегінде жеңіске жетті

АСТАНА. KAZINFORM – Астанада бокстан ерлер мен әйелдер арасындағы әлем кубогі өз шымылдығын түрді. Алғашқы болып шаршы алаңға шыққан Назым Қызайбай жеңіске жетті.

Назым 48 келі салмақта бірінші жекпе-жегінде канадалық Приянка Диллонды айқын басымдықпен ұтты. Осылайша Назым Қызайбай келесі кезеңге жолдама алды.

Бокс федерациясы мәліметінше, оның келесі қарсыласы – өзбекстандық Азия ойындарының чемпионы Фарзона Файзолова.

Айта кетейік, бұл дүбірлі дода елімізде алғаш рет ұйымдастырылып отыр. Жарысты World Boxing ұйымы өткізіп жатыр. Айтулы додаға 30 мемлекеттен 300-ге жуық спортшы бақ сынайды.

Астанадағы жарыста бүгін қазақстандық бес боксшы сынға түседі.