АСТАНА. KAZINFORM - Таиланд корольдігінің Чиангмай қаласында бокстан ерлер және әйелдер арасында өтіп жатқан Азия чемпионатында Диас Молжігітов финалға жолдама алды.
Бұдан бұрын 22 жасқа дейінгілер арасында Азия чемпионатында күміс жүлдегер атанған Д.Молжігітов 75 келіге дейінгі салмақта украиналық Павел Илюшамен кездесті.
Кездесу тартысты өтіп, төрешілердің шешімімен жеңіс қазақстандық боксшыға берілді.
Осылайша, Диас Молжігітов Қазақстан ерлер құрамасынан алтыншы болып финалға шықты.
Тағы бір қазақстандық Ерасыл Жақпеков 80 келіге дейінгі салмақта өзбекстандық Турабек Хабибуллаевпен шаршы алаңға шықты. Бірінші раундта өзбек боксшысы 4:1 есебімен алда тұрды. Екіншісінде Ерасыл артығымен есе қайырды - 5:0. Бірақ төрешілер жеңісті Т.Хабибуллаевқа берді.
Ерасыл сөйтіп қола жүлдені қанағат тұтты.
Еске сала кетейік, бұдан бұрын Дулат Бекбауовтың тәжікстандық боксшыны жеңіп, финалға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).