АСТАНА. KAZINFORM - Бүгін, 3 наурызда, бокстан Италияның Бусто-Арсицио қаласында жалауын көтерген халықаралық турнирде қазақстандық Сәкен Бибосынов жарыстың келесі сатысына шықты.
Қазақстандық боксшы 51 келіде гонконгтық Каннет Чун Хим Танмен қолғап түйістірді.
Үшінші раундта Сәкен қарсыласын техникалық нокаутпен тізе бүктірді. Оған дейін ол гонконгтық спортшыны үш мәрте нокдаунға жіберіп үлгерген еді.
Лицензиялық турнирде 2024 жылғы Париж Олимпиадасының жолдамалары сарапқа салынады. Былғары қолғап шеберлері ерлер арасында 28, әйелдер арасында 21 жолдамаға таласады.
Енді Сәкен Олимпиада жолдамасына ие болу үшін кем дегенде жартылай финалға дейін жетуі тиіс.
Ол 2020 жылы Токио Олимпиадасы мен 2021 жылы әлем чемпионатында қола жүлдегер атанған еді.
Турнир 3-12 наурыз аралығында өтеді.
Айта кетсек, қазірге дейін ел құрамасынан Азия ойындарында Карина Ибрагимова (57 келі) және Қамшыбек Қоңқабаев (92 келіден жоғары) Париж Олимпиадасына жолдама алып үлгерді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.