ОРАЛ. ҚазАқпарат - Оралда теннис орталығында Тәуелсіздіктің 30 жылдығына орай бокстан ерлер арасында Қазақстан чемпионатының финалдық бәсекелері өтуде, деп хабарлайды ҚазАқпарат тілшісі.
Шаршы алаңға алғашқы болып аса жеңіл салмақта батысқазақстандық Даниял Сәбит пен елордалық Санжар Тәшкенбай шықты.
Бұл бәсекеде жастар арасында 2021 жылғы әлем және Азия чемпионы С.Тәшкенбай жеңіске жетті.
Бұдан кейін 51 кг салмақта тағы бір батысқазақстандық Нұрсұлтан Нұриденов пен Алматы облысының өкілі Дамир Әбдіқадыр чемпиондық атақты сарапқа салды. Мұнда төрешілердің бірауыздан шешімімен Д.Әбдіқадырдың қолы көтерілді.
Сондай-ақ 54 кг салмақта тартысты бәсекеде 3:2 есебімен атыраулық Олжас Байниязовты сүріндірген қарағандылық Талғат Сырымбетов үздік шықты.
Финалдық жекпе-жектер одан әрі жалғасуда.
Еске сала кетейік, бұдан бұрын ел чемпионатында алғашқы финалистер белгілі болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).