«Болашақ» шахтасындағы оқиға кезінде 200-ден астам жұмысшы жер үстіне шығарылды
АҚТӨБЕ. KAZINFORM – «Болашақ» шахтасында жұмыс істеп жатқан 228 жұмысшының бәрі жерастынан жоғары шығарылды. Қазіргі кезде облыстық төтенше жағдайлар департаменті жедел желіні іске қосты.
«Қазхром» ТҰК» АҚ филиалы Дөң тау-кен байыту комбинатында болған оқиғадан соң штаб жұмыс істеп жатыр. Оқиға орнынаАқтөбе облысының ТЖД басшылығы, 20982 әскери бөлімінің және ТЖМ Апаттар медицинасы орталығының қызметкерлері барды.
- Оқиға болған кезде шахтада 228 қызметкер болды. Барлық қызметкер жер үстіне шығарылды. Шахтаның жұмысы уақытша тоқтатылды. Хромтау әскерилендірілген тау-кен жасағы сутекті өлшеу жұмысын жүргізіп жатыр. ТЖМ Командалық орталығының ахуалдық залында және ТЖД Дағдарыс орталығында жедел штабтардың жұмысы ұйымдастырылды. Ақтөбе облыстық ТЖД-да жедел желі телефоны (тел: 8-7132-54-86-82) іске қосылды. Әзірге қоңыраулар түскен жоқ,- деп хабарлады ТЖМ баспасөз қызметі.
Еске салсақ, бүгін Дөң кен-байыту комбинатындағы «Болашақ» шахтасында кеншілерді күйік шалды. Полиция тау-кен немесе құрылыс жұмыстарын жүргізу кезінде қауіпсіздік ережелерін бұзу фактісі бойынша қылмыстық істі тіркеді. Бір жұмысшы жансақтау бөлімінде жатыр.