«Болашақ жастардың қолында!» - Павлодарда өткен VI облыстық құрылтайдың жас көшбасшыларының ұраны

ПАВЛОДАР. 1 желтоқсан. ҚазАқпарат - Павлодар облысының балалар-жасөспрімдер ұйымдары «Болашақ жастардың қолында!» атты VI облыстық құрылтайын өткізді, деп хабарлады білім басқармасынан.

Оқушылар сарайына барлық қалалар мен аудандардан мектептер мен қосымша білім беру ұйымдарының балалар-жасөспірімдер қоғамдық бірлестіктерінің 400 жас көшбасшысы, балалар қозғалысының үйлестірушілері және облыстағы білім мекемелеріндегі баспасөз орталықтарының өкілдері жиналды.

Құрылтай делегаттары «Досыңды қарсы ал» акциясына қатысып, пікірталас алаңдарында тәжірибе алмасты, «Бастаушы портреті жастардың көзімен», -Павлодар облысындағы балалар қозғалысының әліппесі», «Облыстағы балалар қозғалысының жағдайы мен болашағы» тақырыптарын талқылады. Белсенділер үшін «Мен - көшбасшы тұжырымдамасымын» тренингтері ұйымдастырылды.

Облыстық құрылтайдың шараларын Оқушылар сарайының балалар баспасөз орталығы жедел түрде жариялап отырды, ол өз жұмысын «Оқиғалар калейдоскопы» газетін шығарумен аяқтады.