Боран салдарынан Алматы-Өскемен күре жолы жабылды

АСТАНА. ҚазАқпарат - «Казахавтодор» мекемесінің хабарлауынша, қатты боран салдарынан Алматы-Өскемен күре жолының 977-1048 шақырымындағы жол учаскесінде көліктің барлық түрі үшін жол қозғалысы жабылды, деп хабарлайды ҚазАқпарат.

Сонымен қатар, бүгін сағат 16.40-тан бері республикалық маңызы бар Омск-Майқапшағай  жолының 587-756 шақырымындағы  учаскесі де көліктің барлық түрі үшін жабық екені хабарланды.

 «Казахавтодор» мекемесінің ақпаратына сүйенсек, Өскемен-Шемонайха-РФ шекарасы жолында рейстегі автобустар,  жүк көліктері мен тіркемесі бар жүк көліктері  үшін қозғалыс шектелген.

Қазгидрометтің хабарлауынша, 10 желтоқсан күні Шығыс Қазақстан облысында тұман түсіп, секундына 15-20 метр жылдамдықпен жел соғады. Айта кетейік, ауа райының қолайсыздығына байланысты бүгін Ақмола облысында, «Астана-Ерейментау-Шідерті» тас жолында және Астана қаласынан бастап, Павлодар облысының аумағына дейінгі жолдар жабылған болатын.