Боранды күні жолда қалған адамдарға көмектескен бір топ ақтөбелік марапатталды

Ақтөбе облысының әкімі Асхат Шахаров бүгін боранды күні қар құрсауында қалған адамдарға ыстық тамақ жеткізген еріктілерді, облыс орталығынан ауданға барып, ота жасаған дәрігер мен жолдағы қауіпсіздікті қамтамасыз еткен полиция қызметкерлерін марапаттады. Сонымен бірге төтенше жағдайлар қызметкерлері де алғыс хат алды. 

«7 ақпан күні Әйтеке би аудандық ауруханасынан ауыр бас-ми жарақаты бар науқастың түскені туралы ақпарат келді. Ес жимаған адамды мүлде тасымалдауға болмайды. Сондықтан мен тапсырмамен жолға шықтым. Ақтөбе қаласынан аудан орталығына дейін 300 шақырым болса, оны 10 сағат жүріп бардық. Бес сағат бойы жолда тұрып қалдық. Бізді полиция қызметкерлері тасымалдады. Барған соң 2 сағат бойы ота жасалды. Біз мұндай жағдайға үнемі дайын жүреміз. Кез келген уақытта көмекке баруымыз керек», - деді Ақтөбе көпсалалы ауруханасының нейрохирургі Нұрсұлтан Айтмурзин.

Марапатталғандар арасында полиция қызметкерлері де көп болды. Олар тек тәртіпті бақыламай, құтқару жұмыстарын да жүргізді. 

«Самара-Шымкент тасжолында қар құрсауында қалған көлік жүргізушілері мен адамдарға көмек көрсетілді. Бұған дейін инсульт алған жүргізушінің денсаулығы қайта сыр берген екен. Оны көлігіме отырғызып, ауруханаға жеткіздім. Сонымен бірге қар құрсауында тұрған адамдарға тамақ тасып, боран басылған соң көліктің жүрісіне көмектестік», - деді Ақтөбе облысы Полиция департаменті патрульдік ротасының взвод командирі Жеңісбек Мұратов.

Бүгін барлығы 40 ақтөбелік марапатталды. Сонымен бірге жолда қалған адамдарға қол ұшын созған аудан, ауылдардағы адамдар да алғысқа бөленді. 

«Барша ақтөбелік жанашырларға рақмет айтамын. Алдағы қызметке сәттілік тілеймін. Қиын кезде адам ысылады, болашақта да адал еңбек ететіндеріңізге еш күмән жоқ», - деді Ақтөбе облысының әкімі Асхат Шахаров.