Бортында экипажы бар «Жеңіс» зымыран тасығышы ғарышқа аттанды
БАЙҚОҢЫР. KAZINFORM – Бүгін Астана уақыты бойынша сағат 10:47-де «Байқоңыр» ғарыш айлағының 31-ші алаңынан «Союз МС-27» басқарылатын көлік ғарыш кемесі бар «Союз 2.1» зымыран тасығышы ұшырылды. Бұл сапар Ұлы Жеңістің 80 жылдығына арналады.
Халықаралық ғарыш стансасына (ХҒС) кезекті, 73-ші ұзақмерзімді экспедициямен ұшырылым жасаған кеменің бортында командир, бортинженер және экспедиция командирі, Роскосмос ғарышкері Сергей Рыжиков, кеменің 1-бортинженері, экспедиция бортинженері, Роскосмос ғарышкері Алексей Зубрицкий және кеменің 2-бортинженері, NASA астронавты Джонатан Ким бар.
Ұшыру процесі штаттық режимде өтті. Ұшу циклограммасына сәйкес, «Союз ТМ-27» ғарыш кемесінің зымыран тасығыштың үшінші сатысынан ұшырылғаннан кейін тоғыз минуттан соң ажырап, кеме Жердің жасанды серігі орбитасына шығарылды.
Ұшу процесі «Роскосмос» әлеуметтік желілерінде тікелей көрсетілді және ғарыш аппараты ғарышқа ұшқан көктемгі қазақ даласының таңғажайып көрінісін тамашалауға мүмкіндік болды.
Байқоңырда ауа райы тамаша, +22 градус, ұшырылымды 2,5 мыңнан астам қонақ пен турист тамашалады. Олардың қатарында Қазақстан Парламентінің депутаттары, мектеп оқушылары, актерлар, тілшілер, блогерлер бар.
Байқоңырдан тікелей репортаж жүргізушілердің айтуынша, ғарышкерлер өздерін жақсы сезінеді.
«Союз ТМ-27» ғарыш кемесін ХҒС-қа түйістіру бүгін ұшырылғаннан кейін үш сағаттан соң жүзеге асады деп жоспарланып отыр.